Fellingsresultat elg, hjort og rådyr hausten 2022

I Skjåk Almenning vart det felt 90 elg og 46 hjort i ordinær jakt hausten 2022. Totalt vart det felt 111 elg og 175 hjort i heile Skjåk. Dette er litt mindre enn i 2021, då det vart felt totalt 113 elg og 229 hjort.

Hausten var store delar både frost- og snøfri, noko som gjorde at kanskje hjorten var vanskelegare tilgjengeleg enn dei to førre åra. Inntrykket av bestanden etter attendemelding frå dei fleste jaktlag, er at det er noko færre elg og hjort - noko som i så fall er i tråd med målsettinga. Slaktevektene er litt høgare på kalv og ungdyr enn i 2021, men framleis lågare enn vi ynskjer.

Største elgen som vart skote i Skjåk Almenning vog 286,5 kg og hadde 14 taggar i geviret. Den tyngste hjorten vog 137 kg og hadde 12 takkar i geviret.

Den eldste elgen som vart felt og aldersbestemt var ei elgku skote i Skjåk Almenning som var 14,5 år. Aldersanalysane på hjort er ikkje klare.

Uttaket av rådyr er stabilt, i 2022 vart det felt totalt 14 rådyr - akkurat det same som i 2021.