Nytt søknadsskjema for småviltjakt for hytteeigarar i Skjåk Almenning
Hytteeigar i Skjåk Almenning
I år legg vi opp kortsalet på ein annan måte for å ta førehald om dårleg produksjon. I fjor viste takseringa ein produksjon på 1,3 kyllingar pr. par. Det vart da likevel opna for jakt. I år kjem vi til å selje mindre kort før takseringa der ein får resultatet av produksjonen. Vi må naturlegvis gjere slike grep dersom den dårlege utviklinga held fram. Vi opnar no søkeportalen for hytteeigarar og jaktpakker. Også desse blir selde med førehald om at produksjonen viser at ein trygt kan opne for jakt. Dersom takseringa viser ein grei produksjon vil vi leggje ut fleire enkeltkort for sal fortløpande (utan prioritering).
Vi skjønar godt at dette ikkje er nokon opitmal praksis med tanke på planlegginga for hausten. Vi tenkjer likevel at oppturen blir større dersom det faktisk blir jakt, enn nedturen med at kortet blir kjøpt på førehand og jakta blir avlyst.
I tildeling av kort vil dei som har hytte i Skjåk Almenning bli prioritert så langt det let seg gjere med 1 jaktkort pr. hytte (eigar/ektefelle/sambuar eller born). Det er ikkje høve til å overdra kort frå andre hytteeigarar. Før har det vore praksis med 2 kort pr. hytte, men for 2022 blir det justert til 1 kort. Årskane er naturlegvis at rypa stadig blir ein meir avgrensa ressurs, samt at det er fleire hytteeigarar som no søkjer om jaktkort.
Det er størst press på å få jakte i felt 3 og 4 (rundt Grotli), særleg i periode 1. Alle kan ikkje forvente å få fyrste ynskje sitt oppfylt – for å få større moglegheiter til jakt, oppmodar vi derfor om å søkje på fleire felt, og/eller fleire periodar.
